أحمد حافظ كل ما يحتاج طالب الثانوية العامة معرفته.. من ساعة ما يوصل اللجنة لحد ما يخرج من الامتحان

كل ما يحتاج طالب الثانوية العامة معرفته.. من ساعة ما يوصل اللجنة لحد ما يخرج من الامتحان

أولا: أول ما تدخل اللجنة هتستلم كمامة وكيس مطهرات.

ثانيا: هتدخل اللجنة تستلم ورقة أسئلة وورقة بابل شيت.

ثالثا: كل فصل (لجنة) هيكون فيه أربع نماذج امتحانات.. نفس الأسئلة لكن ترتيب الأسئلة متغير بينك وبين زميلك.

رابعا: ترتيب الإجابات هيكون مختلف بينك وبين زميلك.. يعني ترتيب الأسئلة مختلف وترتيب الإجابات برضو مختلف.

خامسا: هتلاقي رقم كود على ورقة الأسئلة اكتبه بالنص في ورقة البابل شيت.

سادسا: لازم تكتب رقم الكود علشان يبقى نموذج الأسئلة اللي معاك مطابق للبابل شيت بتاعك.

سابعا: لازم يكون معاك قلم رصاص وقلم جاف ومسطرة وأستيكة (مساحة) وبراية.

ثامنا: استخدم المسطرة في إنك تمشي براحة في البابل شيت وتحط الإجابة قصاد نفس رقم السؤال لأن عينك ممكن تروح على السؤال اللي بعده وتعلم عليه من غير ما تاخد بالك.. هنا أهمية المسطرة.

تاسعا: هتستخدم القلم الرصاص في تظليل رقم الإجابة اللي انت شاكك فيها، وفي الآخر تبقى ترجع لها علشان تظللها بالقلم الجاف لما تتأكد منها.

عاشرا: القلم الجاف هو الأساس في التظليل.. واتأكد إنك ظللت الدايرة كلها.

حادي عشر: لو ظللت إجابة بالجاف وعايز تغيرها.. اكتب عليها علامة (إكس).. وبعدها اختار الإجابة الصح.

ثاني عشر: لو عملت (إكس) على الإجابة الغلط واخترت إجابة صح غيرها.. متقلقش.. هنا جهاز التصحيح الإلكتروني مش هيقول إنك اخترت إجابتين.. هنا هو مش هيصحح السؤال ده وهيصدر إشارة حمراء إن فيه سؤال لم يتم تصحيحه.. بعدها هيكون تصحيحه بالعين المجردة (تصحيح يدوي يعني)، يعني لا تقلق هتاخد درجة السؤال.

ثالث عشر: السؤال اللي تحس إنك هتاخد وقت فيه ومش عارف توصل لإجابة صحيحة من الاختيارات.. سيبه وروح للي بعده، علشان الوقت، وبعدين ابقى ارجع له تاني لما تخلص إجابة باقي الأسئلة.

ثالث عشر: ورقة البابل شيت هتبقى من صفحة واحدة.. يعني هتبقى عارف انت جاوبت على ايه وسايب إيه مش هتقعد تقلب في ورقة الإجابة.. لأنها ورقة واحدة زي ما قلت لك.

رابع عشر: لو عندك (أنا بقولك لو عندك) وقت سجل إجاباتك اللي كتبتها في البابل شيت على التابلت، لو مش عندك وقت اكتفي بالبابل شيت.

خامس عشر: متقلقش.. البابل شيت لو فيه أي مشكلة وانت مش مجاوب إجابة تانية في التابلت.. هيتراجع تاني وهتاخد حقك كاملا.

سادس عشر: متنساش تكتب اسم ورقم جلوس ولجنتك على ورقة الأسئلة وتكتب اسم ورقم جلوسك ولجنتك ورقم الكود في ورقة البابل شيت.

سابع عشر: بلاش تختار إجابة في التابلت وإجابة في البابل شيت لنفس السؤال وتقول هما ياخدوا الإجابة الصح.. كده هتاخد صفر على السؤال ده.. ده لو رجعوا للتابلت أصلا.. لأن طول ما فيش مشكلة في البابل شيت مش هيرجع للإجابة للي انت كتبتها على التابلت.

ثامن عشر: لازم تسلم ورقة الأسئلة وورقة البابل شيت للمراقبين.. علشان زي ما قلت لك هيطابقوا نموذج الأسئلة بتاعك بالبابل شيت، لأن النماذج مختلفة داخل اللجنة الواحدة.

تاسع عشر: لو رفضت تجاوب في البابل شيت وقررت تجاوب في التابلت فقط.. انت كده هتتعامل معاملة الطالب اللي مرحش الامتحان من الأساس.. وهتسقط في المادة.. البابل شيت هو الأساس.. متقولش هجاوب في التابلت وأقولهم المنصة وقعت ولازم أخد الدرجة.. انت كده لا هتاخد درجة ولا نص درجة والتعليمات دي وصلت المديريات واتحسمت خلاص.

عشرون: متحاوش تغش ولا تطلب إجابة من الطالب اللي قدامك ولا اللي وراك.. أسئلتهم ترتيبها مختلف عن ترتيب أسئلتك.. وترتيب الاختيارات عندهم مختلف عن ترتيب الإجابات عندك.. ركز في حالك ومضيعش وقت في حاجة هتضرك مش هتفيدك.

واحد وعشرين: أسئلة المواد غير المضافة للمجموع تقدر تطبعها من موقع الوزارة ابتداء من يوم 3 يوليو وتجاوب عليها في البيت وتبقى تسلمها للجنة بتاعتك.

اتنين وعشرين: عايز تقسم السنة على سنتين انت حر.. عايز تدخل نص المواد وتسيب النص التاني للسنة الجاية انت حر.. التقسيم متاح لأي طالب.

تلاتة وعشرين: لو عايز تتظلم على النتيجة انت حر.. التظلم متلغاش ولسه مستمر إن شالله تتظلم في كل المواد.

أربعة وعشرين: الحالات اللي يحق لك دخول الدور التاني في المادة بالدرجة الكاملة.. لو مريض كورونا.. لو اللي معاك في نفس السكن (أبوك أمك أخواتك) عندهم كورونا.. لو أبوك لا قدر الله مات.. والدتك لا قدر الله ماتت.. لو حصل كارثة طبيعية.. حريق.. الطريق اتقطع ومعرفتش توصل للجنة.. حادثة.. وهكذا.. كل ده بتعمل بيه محضر رسمي في الشرطة، وتقدم طلب تقول فيه حصل لي كارثة كذا يوم كذا وكان عندي امتحان كذا.. وعايز أدخل دور تاني في المادة بالدرجة الكاملة.. حقك.

خمسة وعشرين: نسيت أقولك إنك هتدخل امتحان المادة بالكتاب بتاع الوزارة فقط.. كتاب العربي يبقى كتاب العربي بتاع الوزارة، وهكذا.

ستة وعشرين: لو اتمسكت بموبايل حتى لو مقفول، هتتحسب عليك محاولة غش وهتسقط في المادة.. سيب موبايل مع المراقب.

سبعة وعشرين: لو اتمسكت بموبايل مفتوح هتسقط في المادة وباقي المواد وهتبقى متهم بحيازة وسيلة غش وممكن تتحرم من دخول الامتحان لمدة عام.

ثمانية وعشرين: لو صورت ورقة الأسئلة ونشرتها علشان الإجابات توصل لك.. هتسقط في كل المواد ومش هتدخل الامتحان لمدة سنتين.

تسعة وعشرين: عايز تدرب على الامتحان صح (أسئلة وبابل شيت)، اوعي تغيب عن الامتحان التجريبي اللي الوزارة عاملاه يوم 21 يونيو.

ثلاثون: أسئلة الامتحانات تلتها للطالب المعقول وتلتها للطالب المتوسط وجزء لفوق المتوسط وجزء للمتميز.. اطمن واعمل اللي عليك وسيبها على الله.

مع خالص تمنياتي بالنجاح: أحمد حافظ