أمهات مصر يرفعون شعار متسبش المدرسة لوحدها - متابعة الأبناء حتى الإعدادية لتأسيسهم.. «لو سبناهم مش هيذاكروا»

وتفاعل المئات من أولياء الأمور من الأمهات علي صفحة اتحاد أمهات مصر، في "فيس بوك"، حيث قالت ولي أمر: "لغاية ما يخلص الإعدادية بعد كده اسيبه من أولى ثانوى يعتمد على نفسه وأتابعه فقط لو احتاجني لازم أكون جنبه، المناهج بتتطور ولازم كلنا نساعد ولادنا مفيش أي حاجه لوحدها، الفكره مش أني أسيبه، الفكرة أني أكون مطمنة عليه ومتاكده أنه خلاص فاهم مصلحته وهيمشى أموره صح، المرحلة دى وكل المراحل تحتاج متابعه ومراقبة وتواجد باستمرار لغاية ما يعدوا بر الأمان".

عدم المتابعة هتتسبب في الإهمال

وأضافت ولي أمر: "طبعا بنتابع وهنستمر على المتابعة، مفيش سن بالنسبة لي هقف عنده لأنى شايفه أن عدم المتابعة هيسبب فى الإهمال"، وتابعت أخري: "حسب الطالب اللي قدامك، في حد بيحتاج تنقليه خطوة خطوة وفي حد تاني تأسيسه وتسيبيه وفي حد بيحتاج رؤوس أقلام مش أكثر".

واستكملت أخرى: "البنات واحدة واحدة بيحبوا يعتمدوا على نفسهم مع متابعة بسيطة اسمعلها حاجه واقفه أمامها واشرحلها لكن الصبيان حنفضل متابعين لغاية مالا نهاية"، وذكرت ولي أمر: "المفروض إن من أولى ثانوي خلاص يعتمدوا علي نفسهم، بس المشكلة دلوقتي الدراسة الأون لاين محتاجة متابعة علشان ممكن الوقت كله يضيع مع السوشيال ميديا للأسف".

بذاكر معاهم كلمة بـ كلمة 

"أنا بفضل أتابع لحد تالته إعدادى شرح ومذكرة، بذاكر معهم كلمه بكلمة، أما ثانوي متابعة من بعيد من غير ما أدخل فى منهاهجهم"، تضيف ولي أمر أخرى: "بتختلف من أم لأم على حسب ظروفها لكن الإهتمام أكبر بيبقى للطفل الأول وبعد كده بيقل، لكن أنا شايفة إن مرحلة ابتدائى مهمة للتأسيس بعد كده متابعة بسيطة لأن الأم بيكون عليها عبء كبير".

وأشارت ولي أمر أخري إلى أن: "أنا حاليًا ابني في أولي إعدادى ومش عاوز يذاكر لوحده وحاولت كتير مفيش فايدة لو سبته لوحدة مايعملش حاجة خالص"، وقالت أخري: "لحد تالته إعدادي بتابع، أما من أول أولى ثانوي مع نفسه علشان يبدأ يعتمد ويشيل المسؤولية لكن بتابعه من بعيد"، واختتمت أخرى: "أنا بذاكر معاهم بصراحة ومش بناخد دروس، أنا إللى قايمة بالدور كله لوحدى بالرغم من أنى إمرأة  عاملة، ربنا يعينى ويعنكم جميعا".