حكاية الأستاذ مصطفى صاحب محل " يقوم بتوزيع ملابس المدارس مجانًا على أبناء غير القادرين و يخصص وقت معين من اليوم لعدم الإحراج"

ما إن يقترب شهر سبتمبر حتى يشعر أولياء الأمور بحزن بسبب هَمّ تدبير المصروفات المدرسية والملابس والمستلزمات الأخرى، بعض المواطنين يستعدون للعام الدراسى الجديد بـ«جمعية»، بينما يفشل البعض الآخر فى تدبير ميزانية بدء الدراسة، من أجل هؤلاء خصص صاحب محل ملابس فى مدينة طنطا بمحافظة الغربية، جزءًا من أرباح المحل فى توزيع ملابس مدرسية مجانية على غير القادرين.

مصطفى رزق، مسئول المحل، أراد أن يسهم فى تخفيف العبء على أولياء الأمور خاصة الذين لديهم أكثر من طفلين: «دخلة المدارس دى صعبة وكل بيت بيفضل يحسبها يمين وشمال وفيه ناس بتستلف من بعض عشان تدبر ميزانيتها، وفيه ناس مابتقدرش تجيب هدوم خالص وبتقضى بهدوم السنة اللى فاتت والطفل مالوش ذنب يروح المدرسة بلبس قديم». يبيع «مصطفى»، ملابس لطلاب المرحلتين الابتدائية والإعدادية الحكومية ويتعامل مع مدارس حكومية وخاصة: «لو أسرة كاملة عندها ولدين أو تلاتة وغير مقتدرة تاخد اللى عايزاه من اللبس، كل ده من خير ربنا وهو اللى بيجازينا، عشان الأولاد ماتبصش لغيرها».

مسئول المحل: "بفتح من الساعة 10 الصبح حتى 12 الظهر.. وينقوا المقاسات اللى عايزينها"
وحتى لا يسبب إحراجاً لغير المقتدرين، يقوم بتقديم الملابس فى وقتٍ مبكر من كل يوم: «بفتح المحل من 10 الصبح، من الوقت ده لحد 12 الضهر ياخدوا اللى هما عايزينه وينقوا المقاسات اللى تناسبهم وهيكونوا لوحدهم بعيد عن الناس اللى بتشترى لأن زباين المحل بتيجى بعد كده».

للعام الثانى على التوالى يتبنى «مصطفى» هذه المبادرة بسبب الأسعار المرتفعة، وكذلك تكاليف التقديم للمدارس، وكل عام يزداد الإقبال عليها: «وجود ناس بأعداد كبيرة بيفرحنى جداً وبيحسسنى أنى بعمل حاجة خير بتساعد بعض الأسر»، وأعلن «مصطفى» أن هذا العرض المجانى مستمر حتى بداية العام الدراسى الجديد: «هعمل كمان جواكت مجانية لغير القادرين مع الفصل الدراسى التانى عشان الشتاء، ولأن أسعار الملابس الشتوية مختلفة».