للطلاب الجدد – كلية الآثار طبيعة الدراسة بها و أقسامها و مستقبلها فى سوق العمل

نعرفكم بنفسنا الاول احنا اتحاد طلاب الكلية طلبة زمايلكم من اولى لرابعة من كل الاقسام 

الف مبروك ليكم نجاحكم فى الثانوية العامة وتعبها وربنا يكون فى عونكم بعد السنة الصعبة دى ومبروك دخولكم اثار 

طيب فى البوست دة هنعرفكم الكلية عبارة عن ايه وهنجاوبكم على كل اسئلتكم تقريبا

اول حاجة الدراسة فى الكلية 4 سنين أول سنه بتبقى عام بتدرس فيها نبذه عن كل الاقسام والكلية بتتكون من اربع اقسام قسم الآثار الإسلامية قسم الآثار اليونانية والرومانية قسم الآثار المصرية وقسم ترميم الاثار بيتقسم ل٣ شعب (ترميم الآثار العضويه و ترميم الاثار المعمارية وترميم الاثار الغير عضوية) ومن بداية سنه تانية بتتخصص على حسب شروط او اختبارات وهى:

قسم مصرى عن طريق درجة الانجليزى فى ثانوية عامة وبتختلف كل سنة عن التانية على حسب متوسط درجات الانجليزى بتاع الطلاب اللى دخلوا الكلية وتقريبا كدة بتتراوح ما بين 43 ل 47 - قسم يونانى بردة عن طريق درجة الانجليزى فى امتحانات الثانوية العامة وبتتراوح بين 42 ل 45 - قسم اسلامى مالوش شروط - قسم ترميم ليه اختبارات (غير عضوى - عضوى) بتكون عبارة اختبار رسم زيت ورصاص اما (ترميم معمارى) فدة متاح لخريجين شعبة علمى رياضة وعلوم وخريجين معمارى من طلاب مدرسة الترميم ومعهد ترميم الاقصر وبيكون اختبارة امتحان فى رياضة 2 ورسم معمارى هتقول مبعرفش ارسم سواء زيت او رصاص او معمارى هقولك سيبها لوقتها الكلية بتعمل كورس فى الاختبارات دى تعلمك ( بس فى شرط لدخول الاقسام ككل وهى انك تنجح فى المادة ا المادتين المتعلقين بالقسم فى اولى)

في اولى بتدرس كل ترم ٦ مواد 

الترم الاول مواد (تاريخ مصري... اثار مصري ... اثار وتاريخ يونانى وروماتي ... لغه اوروبية حديثة... لغة عربية .. مبادئ ترميم الاثار العضوية )

الترم التاني (اثار وحضارة اسلامية .. تاريخ مصر الاسلامى .. مبادئ ترميم الاثار الغير العضوية والترميم المعمارى .. حاسب الى .. حقوق انسان ..مادة القوانين والتشريعات المتعلقة بالاثار)

طبعا فى زيارات واللى الكل بيكون مركز معاها اوى فى الكلية

فى اولى عندك زيارات زى

الترم الاول (المتحف المصرى - الهرم - سقارة) والترم التانى (القلعة - مجمع الاديان - السلطان حسن - الازهر - شارع المعز - وغيرها كتير تقريبا كل الاثار الاسلامية فى القاهرة)

وغير كدة كل قسم له زيارات خاصة بيه

ترميم (الاقصر واسوان - الاسكندرية) مصرى ( المنيا - الاقصر واسوان - الاسكندرية) يونانى (الاقصر واسوان - الاسكندرية - المنيا) اسلامى (الاقصر واسوان واسكندرية ورشيد)

التقديم بيكون فى الفترة اللى من نص شهر اغسطس ونص شهر سيبتمبر وبيكون فيه الكشف الطبى واول ما يتحدد ميعاده هنبلغكم بيه اكيد ومتقلقوش والله التقديم بيقعد ل تانى وتالت اسبوع فى الدراسة كمان 

ودى الاوراق المطلوبة للتقديم شهادة الثانوية العامة.

شهادة الميلاد كمبيوتر.

عدد 6 صور شخصية.

صورة البطاقة الشخصية.

صورة بطاقة الترشيح.

نموذج 2 جند للذكور فقط 

والسؤال الاعظم انهى قسم احسن وانهى قسم اصعب

مافيش الكلام دة ادخل الكلية ادرس اولى الاول وانت تاخد فكرة عن كل قسم وتعرف تخصصه ومواده هتكون عامله ازاى

وهتلاقونا معاكم فى كل خطوة وده لينك جروب الدفعة الرسمي الخاص بيكم https://www.facebook.com/groups/owla.athar.cairo/