أولياء أمور عن تسريب الامتحانات: "فلوس وتعب سنة بتروح علينا دى مسخرة"

أولياء أمور عن تسريب الامتحانات: "فلوس وتعب سنة بتروح علينا دى مسخرة"
الأربعاء، 10 يونيو 2015 - 02:11 م
 
وجه عدد من طلاب الثانوية العامة بمدرسة الدكتور عبد العزيز السيد للثانوية بنين، رسالة إلى صفحة "شاومينج بيغشش طلاب الثانوية العامة" خاصة بعد تداول ورقة مادة اللغة الإنجليزية اليوم "الأربعاء" تزامنا مع أداء الامتحان.

وأشار أحد الطلاب ويدعى "محمد أحمد" قائلا: "هو بيساعد الطلبة أنا مؤيدة عشان هو بيحارب فكرة العقم والتخلف اللى فى نظام الثانوية العامة اللى بيقيس الطلاب بناء على المذاكرة والحفظ مش القدرات الخاصة اللى بيمتلكها".

فى حين يرى الطالب "أيمن": لا طبعا أنا ضد عملية التسريب اللى بتتم فى الامتحانات لأنها بتضيع تعبنا ومجهود ناس تعبت لمدة سنة وأكتر كمان عشان واحد فاشل ييجى فى ثانية يقفل المواد بالغش والتزوير"، وأضاف الطالب "كمال": الامتحانات لما بتتسرب محدش بيشيل الهم غيرنا لأن الدرجات بتبقى وحشة جدا والتنسيق بيكون عالى وإحنا اللى بنتدمر".

أما عن آراء أولياء الأمور حول تداول ورقة مادة اللغة الإنجليزية للمرة الثانية منذ انطلاق ماراثون الثانوية العامة، ترى والدة الطالب "إبراهيم": تسريب الامتحانات دى مسخرة وقلة أدب إزاى الوزارة ساكته على التسريب والغش علنى كده، فلوس وتعب سنة بتروح علينا عشان عصابة فاشلة بتغشش الطلاب".

وترى مدام منى: "أعتقد أن تسريب امتحانات الثانوية العامة مؤامرة بهدف التشويش على الإنجازات التى يقوم بها النظام الحالى ومخطط ضمن إبراز صورته بشكل سلبى فى عدم القدرة على ضبط سير الامتحانات".

وكان طلاب الثانوية العامة قد أدوا اليوم الأربعاء امتحان مادة اللغة الإنجليزية فى إطار ماراثون الثانوية العامة ومن المقرر أن يؤدوا غدا امتحان مادة التربية الوطنية.