حوار بين معلم متعاقد ومدير العمل:

يخرج المتعاقد من بيته صباحا فى تمام الساعة السادسة والنصف صباحا مكدر الوجه, يلهث جاريا ليلحق وسيلة مواصلات تقله الى المعهد الذى يبعد ما يقارب الـ 10 كيلومترات

...يصل "المتعاقد" الى عمله..ومن فرط حنقه وغضبه على سوء أوضاعه المتردية لم يسلم على أحد..

شيخ المعهد: أهلا يا أستاذ "فلان" تعالى امضى بالدفتر..

ويتجه ال "المتعاقد" نحو الدفتر فى صمت ويمسك بالقلم ليوقع على الحضور..

شيخ المعهد: مالك يا استاذ مكشر ليه؟

المتعاقد: لا ابدا مافيش

ثم يجلس منتظرا موعد بدء عمله ليدخل الفصل ويقوم بأداء عمله..وهو جالس يأتى العامل "الفراش" وهو من المعينين..

العامل: بيقولوا انهم طبقوا حافز 200% للعمال والاداريين هاهاهاهاها..والله الحكومة دى حكومة اولاد حلال..ربنا يخليلنا الببلاوى بيه

شيخ المعهد: مبروك يا حاج محمود عليك الحافز..انت كدة بقيت تاخد مرتب اكتر من المتعاقدين بقى هاهاهاهاهاها

ويجلس المتعاقد وهو يستمع الى تلك الاشارات ويزداد حنقه وغضبه..
وفجأة..يدخل أحد المتعاقدين ويقول لزميله المتعاقد: انت ماسمعتش؟ النهاردة بداية العام الدراسى الجديد..وفى اضراب عن العمل..

المتعاقد: إضراب؟ ليه؟ هو مبارك والحزب الوطنى رجعوا يحكموا البلد تانى ولا ايه؟

الزميل المتعاقد: لا يا أخى..دى دعوات كانت موجودة فى الفايسبوك فى صفحة جبهة معلمى الأزهر المتعاقدين عشان لسة ماتثبتناش ولا اخدنا حد أدنى للأجور..وكمان الكادر اللى امتحنا فى 2009 لسة ماخداناهوش..

ويأتى بقية الزملاء المتعاقدين وينتشر الخبر بينهم..ويعقدون النية على الدخول فى الاضراب عن العمل..

وصل النبأ الى شيخ المعهد..

شيخ المعهد: اتفضلوا يا أساتذة .. جرس الحصة ضرب.

المتعاقدون: مش قايمين

"ويجلس الجميع بمكتب شيخ المعهد وكل شخص "حاطط" رجل على رجل"

شيخ المعهد: ازاى يا بهوات؟ انتم كدة بتعطلوا العمل ودى فيها تحقيق

المتعاقدون: تحقيق تحقيق..هايحصل ايه يعنى؟

شيخ المعهد: هايتم فصلكم عن العمل

ثم يتدخل أحد المعلمين المعينيين ويقول:
بلاش شغل العيال اللى انتم فيه ده يا متعاقدين..قوموا اشتغلوا اوحمدو ربنا انكم شغالين بالعقد..غيركم مش لاقى شغل..

ملاحظة: المعلم المعين ده معاه "دبلوم معلمين" وبيتكلم مع شباب متعاقد حاصل على ليسانس وبكالوريوسات وبتقديرات تبدأ من جيد جدا


وهنا نظر المتعاقدون الى بعضهم البعض وتكلم أحدهم..وقال: ضربوا الأعور على عينه..قال خربانة خربانة..

ايه رأيكم يا جماعة..انت يا استاذ احمد مش متجوز..وانت يا استاذ محمود عايش لوحدك من غير اسرة..وتقريبا كدة كل المتعاقدين اللى هنا ماعندهمش حاجة يخسروها..نقوم نتذل أكتر من كدة ونسكت ونشتغل ونرضى بشوية الملاليم اللى بناخدها؟
وننسى حقنا فى التعيين؟

أحد المتعاقدين: على جثتى

متعاقد أخر: يبقى أخر يوم فى عمرى

متعاقد ثالث: دا انا اولع فى المعهد باللى فيه..

ثم تنتشر حالة من الفوضى والهرج والمرج ويقوم شيخ المعهد بالاتصال بالمنطقة الأزهرية ليبلغ عن حالة العصيان هذه..
.
.
.
.
.
.
.
.
.
والى هنا تم قطع الارسال ولا نعرف للقصة بقية..على أمل أن يأتى أحد المعلمين المتعاقدين ليقص علينا ما حدث فى "الاضراب عن العمل"
هل تم الاستجابة لمطلب التثبيت؟ هل تم تطبيق الحد الأدنى للأجور؟ هل تم صرف استحقاق الكادر الذى لم يصرف منذ 2009؟

هذا ما سنعرفه مع بداية العام الدراسى القادم...وكل عام أنتم بخير

------------------------------​------------------------------​---------------
بقلم: معلم غضبان جدا جدا لكل مايسمعه ويراه... مستر مهند