آخر كلام عن اليوم الرياضي في المدارس الصحفي أحمد حافظ

آخر كلام عن اليوم الرياضي في المدارس:

= اليوم الرياضي هيبدأ تطبيقه على 25% من مدارس كل إدارة تعليمية.. يعني لو إدارة تعليمية فيها 12 مدرسة ابتدائية، هيتطبق اليوم الرياضي في 3 مدارس فقط، لو فيها 8 مدارس إعدادية هيتطبق في مدرستين فقط، لو فيها مدرستين ثانوي عام هيتنطبق في مدرسة واحدة، وهكذا.

= المدارس اللي هيتطبق فيها اليوم الرياضي، هتكون بمثابة "بيوت خبرة"، لباقي المدارس.. يعني المدرسة اللي مطبقتش اليوم الرياضي، المدير بتاعها والمسؤولين اللي فيها، هيعملوا زيارات للمدارس اللي طبقت اليوم الرياضي، يشوفوهم بيعملوا إيه، وياخدوا الخبرة منهم، وبعد كده يبدأوا التطبيق بعد كده.

= الإدارة التعليمية هي اللي هتحدد أنهي مدارس بالظبط هيتطبق فيها اليوم الرياضي.. بشرط: المدرسة اللي هيتطبق فيها اليوم الرياضي، هيبقى جمبها أو قريب منها، مدرسة أو اتنين أو تلاتة مش بيطبقوا اليوم الرياضي، يعني كل منطقة كده هيبقى فيها مدرسة بتطبق، والباقي لأ.. وبعد كده يبدأ التطبيق تدريجي.

= المدرسة اللي هيتطبق فيها اليوم الرياضي، هيتعمل لها جدول معين للحصص.. مش مدير المدرسة اللي هيعمل الجدول.. لأ، الإدارة التعليمية هي اللي هتعمل جدول الحصص في المدرسة دي.. بحيث يكون فيه يوم كامل مفيهوش دراسة خالص، ويكون عبارة عن أنشطة رياضية وفنية وثقافية.. وده هيكون بالتبادل.. يعني يوم نشاط رياضي، الأسبوع اللي بعده نشاط فني، واللي بعده ثقافي، وهكذا، وجدول الحصص هيكون 4 أيام في المحافظات اللي فيها أجازة يوم السبت، و5 أيام في المحافظات اللي مفيهاش أجازة يوم السبت، واليوم اللي ناقص هيبقى هو ده اليوم الرياضي.

= اليوم الرياضي ده لعب كرة، قدم سلة تنس جري ترفيه قراءة رسم سواء داخل المدرسة أو في مراكز الشباب والمكتبات والنوادي والساحات الرياضي، المهم يكون فيه نشاط أسبوعي حسب إمكانيات كل مدرسة، وحسب الجدول اللي محطوط من الإدارة التعليمية.

= بنهاية الترم الأول، هتكون عدد المدارس اللي بيتطبق فيها اليوم الرياضي، 50% من إجمالي المدارس، وده هيكون على مراحل.. يعني ممكن كل أسبوعين تلاتة تدخل مجموعة مدارس في التنفيذ.

= مش هيكون فيه تخفيف ولا حذف مناهج علشان تطبيق اليوم الرياضي.. والبديل اللي الوزارة بتفكر تطبقه، وتقريبا أخدت قرار نهائي بتطبيقه.. إنها هتعوض اليوم الدراسي بحاجة اسمها "حصص للمشاهدة".. مع العلم إن حصص المشاهدة دي مش هتكون طول اليوم الدراسي.. لأ هتكون في أوقات محددة، وباقي الحصص هيشرحها المعلم بشكل عادي.

= يعني إيه حصص المشاهدة؟.. يعني هتوزع الفيديوهات التعليمية اللي بتعملها قنوات "مدرستنا" لكل الصفوف الدراسية، وتسلمها للمدارس بشكل أسبوعي.. المعلم هيشغل مثلا، فيديو لدرس لغة عربية.. هيشغله على "داتا شو"، أو على الحائط (زي حصة الكمبيوتر بتاعت زمان كدة).. المعلم اللي في الفيديو بيشرح الدرس، والمعلم اللي في الفصل بيناقش الطلاب في اللي بيقوله المعلم اللي في الفيديو.. وكل حصة من حصص المشاهدة هتكون مدتها الزمنية تعادل حصتين في اليوم العادي، وممكن ينضم فصلين على بعض وقت حصة المشاهدة حسب الكثافة، علشان تتعوض حصص اليوم الرياضي.. مع العلم: إنه هيكون فيه درجات عن المشاركة في اليوم الرياضي كنوع من التشجيع والتحفيز.

= ملحوظة: ده مش مقترح، ده اليوم الرياضي اللي هيتطبق حرفيا بالمدارس.