إجـــــــــــــراءات الترقيــــــــــة لدفعة 2016 معلمي التربية و التعليم

                          كـــــــــــــالأتـــــى

 المرحلة الأولى:

اللي هي الفترة دي ... في حالياً تعليمات للمدارس بتحديث بيانات العاملين فيها وبداية من يوم ٧/٣ لغاية ٢٠٢٢/٨/٤ هتلاقي أسمك نزل علي موقع إحصاء المدرسة لو أنت مستهدف من الترقية وهيبلغك مسئول الإحصاء في مدرستك وساعتها مطلوب منك تجيب صورة طبق الأصل من آخر تقريرين أداء (ويكونوا كفء أو فوق متوسط) وتسلمهم لمسئول الإحصاء علشان يسجلهم وبالنسبة للحاصلين علي الماجستير والدكتوراة فحضرتك بتاخد صورة من شهادة الماجستير أو الدكتوراة طبق الأصل وصورة من صحيفة الحالة وبتروح قسم الإحصاء بالإدارة التعليمية وتملئ أستمارة عدم الإستفادة من التخفيض من قبل (في المرفقات) .. ومسؤول الإحصاء هيسجلك في الموقع علشان تبدء إجراءات الترقية

 المرحلة الثانية:

 طب وبعد كده أيه اللي هيحصل؟

بعد إنتهاء مدة المرحلة الأولى هتعلن الأكاديمية عن بداية المرحلة الثانية واللي بتكون عبارة عن ملف الترقية الإلكتروني للمعلم وهو عبارة عن ٥ بنود كل بند عليه ٢٠ ٪ ... لازم تتأكد في النهاية أنه بقي ١٠٠ ٪

الأول: ---بيانات بسيطة عن المعلم هتكتبها علي صفحتك علي موقع الأكاديمية سهلة تكتبها أنت أو تخلي أي حد يكتبهالك

الثاني:---- تقييم مدير المدرسة للمعلم .. ودا بيسجله المدير .. أنت كمعلم ملكش دعوة بيه .. أنت بس بتتابع هو أتسجل ولا لا

الثالث: -----تقييم الموجه للمعلم .. ودا بيسجله الموجه مع المدير .. أنت كمعلم ملكش دعوة بيه .. أنت بس بتتابع هو أتسجل ولا لا

الرابع: تقييم الإدارة التعليمية .. ودا بتسجله الإدارة.. أنت كمعلم ملكش دعوة بيه .. أنت بس بتتابع هو أتسجل ولا لا

الخامس: إقرار المدة البينية ال ٥ سنوات ودي إفادة بتجيبها من الإدارة التعليمية إنك كملت ٥ سنين عمل فعلي وبتسلمها لمسوؤل الإحصاء بالمدرسة وتتابع هو سجلها ولا لا

المهم بعد ال ٥ بنود ما يتسجلوا هيظهرلك نسبة إنجاز الملف ١٠٠٪

المرحلة الثالثة:

طب وبعد كده أيه اللي هيحصل؟

بعد إنتهاء مدة المرحلة الثانية هتعلن الأكاديمية عن بداية المرحلة الثالثة والأخيرة والأهم .. وهي الاختبار الإلكتروني ... وفيها بيحجز المعلم ميعاد محدد للاختبار برسوم تقترب من ٧٠ جنيه ... وهو عبارة عن اختبار مكون من ١٠ محاور كل محور ليه مادة علمية وعليها ٤ أسئلة أختيار من متعدد بزمن محدد وللمعلم ٣ محاولات للنجاح في الاختبار حيث تظهر على الشاشة في النهاية إفادة إجتياز الاختبار وبنهاية الاختبار تنتهي رحلة كفاح المعلم من أجل الترقية في أنتظار قرار الوزير ثم قرار المحافظ......

في النهاية أتمنى أن نكون قد أوضحنا كل ما يخص الترقية من إجراءات ومراحل

مع التأكيد علي التالي

كل مرحلة بيتم تحديد مواعيدها بعد نهاية المرحلة السابقة ليها وغالباً ما يتم تمديد المواعيد الخاصة بكل مرحلة لمصلحة المعلمين المتأخرين في إنهاء المطلوب منهم

المطلوب من المعلمين المستهدفين للترقية فقط مايلي:

آخر تقريرين أداء وتسلم لمسؤول الإحصاء بالمدرسة.

إقرار المدة البينية ال ٥ سنين وتسلم لمسؤول الإحصاء بالمدرسة.

متابعة الملف الإلكتروني حتي يصل إلى نسبة ١٠٠٪

أداء الاختبار الإلكتروني

بالتوفيق للجميع